ZORAM TODAY| Aizawl 18th June, 2024 (Tue): Tukin zing khan South Tuipui bialtu MLA  Jeje Lalpekhlua chuan Hnahthial khawchhunga sawrkar department te hmalakna hnathawh hrang hrang a hmunah tlawhin a enfiah a, Bawrhsap pisa panna kawng siam thar a tui luankawr siam dan turte, bawhhlawh paih lailawkna hmunte, Electric veng-a kawrpui siam ngai leh PHE in Rallangtlanga tui dahkhawlna an siam mekte a hmunah a tlawh.

Jeje Lalpekhlua MLA chuan Hnahthial Bawrhsap pisa panna kawng SASCI sum hmanga siam zawh tawh, tui luan kawr (side drain) siam hmabak a tlawh a, tui luan kawr siam a nih theih nan leh retaining wall rem a nih theih nan hmalak vat a tum thu a sawi. Hemi hnu hian bawlhhlawh sawngbawlna thar tur Haulawng kawng a mi a tlawh bawk a, hei pawh hi chak taka bawhzui a tum thu a tarlang a, Electric Venga kawr pui, a bula in awm te tana hlauhthawn awm pawh enfiahin UD&PA lama hmalak a nih tur thu a sawi bawk.

Hemi hnu hian  Jeje Lalpekhlua hi Hnahthial-a MLA Office-ah thu in chawhma lamah khaw pawn atanga amah dawr duhte tan hun hawn a ni a, chawhnu lamah Hnahthial khawpui chhunga amah dawr duhte tan hun hawn a ni bawk.